ரவுத்திரம் பழகாவிடில்???

சில காலமாக எழுத்தார்வத்துக்கு அணை போட்டு வைத்திருந்தேன்.. அண்மையில் நான் சந்தித்த நிகழ்வொன்று கண்டிப்பாய் யாருடனும் பகிர்ந்தே ஆகவேண்டும் என்னும் உந்துதலை எற்படுத்தி விட்டதால் பதிவிடுதலைத் தொடர்கிறேன்.
பெண்கள் வாழ்வில் சந்திக்கும் மிகப் பெரிய பிரச்சினை பொது இடங்களில் கண்ணியமான உருவத்துடன் உலவும் சில சில்மிஷ சில்வண்டுகள்.அத்தகைய அல்ப சில்மிஷங்கள் ஆண்களுக்கு சில நிமிட பொழுது போக்காகத் தோன்றினாலும்,அதில் பாதிக்கப்படும் அப்பாவிப் பெண்களின் வாழ்க்கையையே கேள்விக் குறியாக்கிவிடுகிறது.
அத்தகைய ஒரு நிகழ்வு.
சில நாட்களுக்கு முன் ஒரு கல்லூரியில் தொடங்கிய‌ முதலாண்டு வகுப்புகளுக்கு பட்டாம்பூச்சிகளாய் சிறகடித்து வந்த மாணவிகளுள் ஒருத்தியை பற்றித்தான் நான் கூறப்போகிறேன்.
செல்வி என்னும் மாணவி மிகவும் பிற்படுத்தப்பட்ட ஒரு மலைகிராமத்தில் இருந்து தன் கடும் முயற்சியில் படித்து பொறியியல் படிப்புக்கான இடம் பெற்றாள்.கல்லூரிப் படிப்புக்கான பணம் கூட கட்டமுடியாமல்,கல்லூரித் தாளாளாரின் சிறப்பு ஒதுக்கீட்டில், கட்டணச் சலுகை பெற்ற மாணவி. தான் எதையாவது சாதிக்க வேண்டும் என்னும் உத்வேகம் நிரம்பப் பெற்றிருந்தாள்.கல்லூரியில் தன் அப்பாவித்தனத்தால் அனைத்து ஆசிரியர்களின் கவனத்தையும் ஈர்த்திருந்தாள்.
நகரத்தின் நரகங்கள் ஏதுமறியாக் குழந்தையாகவே இருந்த அவளுக்கு ஊரைச் சுற்றிக்காட்ட,அவளது தோழிகள் அழைத்துப் போயிருக்கிறார்கள். பேருந்தில் அவளுக்குப் பின் நின்றிருந்த ஏதோ ஒரு மிருகத்தில் கேவலமான சில்மிஷச் சீண்டலால் பயந்து போன செல்வி,மனதளவில் மிகவும் பாதிக்கப்பட்டிருக்கிறள் .ஆண்கள் அனைவரும் மோசம் என்னும் எண்ணம் அச்சிறுமியின் மனதில் பதிந்திவிட்டது.ஆண் ஆசிரியர்களைக் கூட அவளால் இயல்பாக ஏற்றுக் கொள்ள முடியவில்லை.அதன் விளைவு அவள் படிப்புக்கு விழுந்த்து முட்டுக்கட்டை.படிப்பை விடுத்து தன் வீடு திரும்பிய மாணவியை கிராமத்துப் பெற்றோர் கட்டாயப்படுத்தியதன் விளைவு.அவளது மரணம்.ஆம்..அவள் தன் உயிரை மாய்த்துக் கொண்டாள்.

ஒரு வளரும் பயிரின் வாழ்வு முளையிலேயே கிள்ளி எறியப்பட்டதற்குக் காரணமானவனுக்கு என்ன தண்டனை கிடைக்கப்போகிறது.இத்தகைய மனிகர்களுக்கு மனசாட்சி என்பதே கிடையாதா? தனது ஏதோ ஒரு உணர்ச்சித் தூண்டலுக்குப் பலியாக்கப்படும் அப்பாவிப் பெண்களைப் பற்றி இவர்கள் என்னதான் நினைத்துக் கொண்டிருப்பார்கள்? பெண்கள் எல்லாம் இவர்களால் ஆட்டுவிக்கப்பட படைக்கப்பட்ட பொம்மைகள் என்றா?
"ரவுத்திரம் பழகா"விடில் பெண்கள் வாழ முடியாதா?

.